Kvam herad har gitt Haukås Skiløypelag dispensasjon og byggjeløyve til å føre opp ein ny garasje for tråkkemaskina på Haukås i Strandebarm. Etter ein runde med reviderte planar er prosjektet no godkjent.
Garasjen har ei grunnflate på om lag 70 kvadratmeter. Den opphavlege plasseringa møtte fyrst motbør frå Statsforvaltaren i Vestland, som i april i år rådde frå prosjektet på grunn av inngrep i sårbart myrareal og karbonrike område.
Skiløypelaget snudde seg rundt og endra plasseringa nærare eksisterande veg og bygg, til omtrentleg 60 meter rett sør for pumpehuset som ligg langs vegen inn til hyttefeltet. Rådmannen vurderer at den nye plasseringa vesentleg reduserer konfliktane med natur, landskap og friluftsliv.
– Tiltaket har ein klar samfunns- og friluftsfunksjon, skriv rådmannen i sitt vedtak. Garasjen vil sikre betre lagring av tråkkemaskina, og den nye plasseringa rett ved løypenettet gjer at ein unngår unødig køyring og slitasje på berr mark og dyrka jord.
Bygget skal førast opp med saltak, dempa material- og fargebruk tilpassa hyttefeltet i området, og det er stilt vilkår om at garasjen plasserast slik at den sikrast mot flaum. Budsjettet er på omlag 1 million kroner. Skiløypelaget fekk i november ei gledeleg melding frå Sparebanken Norge om at me har motteke 100 000 kr til føremålet.
Planen er å kome i gang med grunnarbeidet, men for å kunne starte sjølve bygginga lyt finansieringa ferdigstillast med meir stønad og midlar.
Skiløypelaget vert glade for alle bidrag til løypekøyring og garasje!